ရိုးတံ အကိုင်းဆက်နည်း

ရိုးတံ အကိုင်းဆက်နည်းကို အင်္ဂလိပ်ပိုင် Whip Grafting လို့ ခေါ်ပါရေ။



အဆင့် - ၁ လုံးပတ်တူ ကိုင်းဆက်ခံဖို့ အပင်နန့် လားဆက်ဖို့ အပင်ကို ရွီးပါ။

ကိုင်းဆက်ခံဖို့ အပင်နန့် လားဆက်ဖို့ အပင် နှစ်ပင်လုံးစွာ သန်သန်စွမ်းစွမ်း ဖြစ်ရပါဖို့။

ရောဂါ ဖြစ်နိန်ရေ အပင်မျိုး မဖြစ်ပါဇီကဲ့။

- ရိုးတံ အကိုင်းဆက်နည်းအတွက် ကိုင်းဆက်ခံဖို့ အပင် အရွယ်အစားနန့် ကိုင်းလားဆက်ဖို့ အပင် အရွယ်အစား အတူတူ ဖြစ်ဖို့ လိုပါရေ။

- ပုံမှန်ဆိုကေ အချင်း ၁ မတ် ( 1/4 လက်မ ) ကနိန် ငါးမှုး (  1/2 လက်မ ) အလုံး ရှိရေ အပင်တိကို ဆက်ကတ်စွာ များပါရေ။

- ရိုးတံ အကိုင်းဆက်နည်းကို ရွက်နုတိ၊ အကိုင်းသစ်တိ ထွက်တတ်တေ ရာသီ မတိုင်ခင် ကြိုလုပ်ရလေ့ ရှိပါရေ။

- လားဆက်ဖို့ အကိုင်းစွာ ၁ ပေ လောက် ရှည်ပနာ အကိုင်းတက် အသစ်တိ ထွက်လို့ မပါ ပါဇီကဲ့။ ယကေလည်း အကိုင်းသစ်ထွက်ဖို့ ဘု အတက်ချေ လေး ငါးတက်လောက်တော့ခါ ပါ ပါဇီ။



အဆင့် - ၂  လားဆက်ဖို့ အကိုင်းကို အယင် ဖြတ်ထုတ်ပါ။

အကိုင်းဖျားကို ဆက်ဖို့ အကိုင်းရင်းက ၁ ပေ လောက် အကွာမှာ ထပ် ဖြတ်ပလိုက်ပါ။

အကိုင်းရင်းမှာ ကကောင်း စောင်းနိန်ရေ အင်္ဂလိပ် စကလုံး z ပုံသဏ္ဍန် ဖြစ်အောင် ခဲတံချွန်ဓါး (ဝါ) ဘလိတ်ဓါးနန့် ထပ်ဖြတ်ပါ။



အဆင့် - ၃ အကိုင်းဆက်ခံဖို့ အပင်ကို ဖြတ်ပါ။

ဖြတ်ထားရေ အကိုင်းဖျားမှာ လာဆက်ဖို့ အကိုင်းမှာ ဖြတ်ထားခရေ ပုံသဏ္ဍန်အတိုင်း ကကောင်း စောင်းနိန်ရေ အင်္ဂလိပ် စကလုံး z ပုံသဏ္ဍန်ကို ခဲတံချွန်ဓါး (ဝါ) ဘလိတ်ဓါးနန့် ထပ်ဖြတ်ပါ။

အဆက်ခံဖို့ အကိုင်းနန့် လာဆက်ဖို့ အကိုင်းစွာ ဆက်ကြည့်လိုက်ကေ ကွက်တိ ဖြစ်နိန်ဖို့ လိုပါရေ။



အဆင့် - ၄ လိုအပ်တေပိုင် လျှာတိကို ဖြတ်ပါ။

ဆက်လိုက်စွာနန့် တဖက်နန့် တဆက် လုံးဝ ကပ်နိန်ပနာ တဆက်တည်း ဖြစ်အောင်ထိ ထပ်ဖြတ်ပါ။



အဆင့် - ၅ လာဆက်ဖို့ အကိုင်းကို အဆက်ခံဖို့ အကိုင်းထဲမှာ အသေအချာ ထည့်ပါ။

အစိမ်းရောင် အခေါက်တိ တဖက်နန့် တဖက် လုံးဝ ထိဆက်နိန်ဖို့ အရေးကြီးပါရေ။ မဟုတ်ကေ အကိုင်းဆက်စွာ အောင်မြင်ဖို့ မဟုတ်ပါ။



အဆင့် - ၆ အဆက်နိန်ရာကို အသေအချာ စည်းပါ။

ဆွဲနိုင်ဆန့်နိုင်ရေ ရာဘာနန့် တတင်းချေ ပတ်ချိုင်ပါ။ ပလက်စတိတ် အပြားချေဆိုကေလည်း ရပါရေ။

တလလောက် ကြာကေတော့ခါ ပတ်ထားရေ ပတ်တီးကို ဖြုတ်ဖို့ လုံးဝ မမိပါကဲ့။


အဆင့် - ၇ အကိုင်းဆက်နိန်ရာကို စောင့်ကြည့်ပါ။

အကိုင်းဆက် အောက်ဖက်မှာ အကိုင်းသစ်ချေတိ ထွက်လာကေ ချက်ချင်း မချိုးပလိုက်ပါကဲ့။

အထက်ကိုင်းမှာ အကိုင်းသစ်ချေတိ ထွက်လာအောင်ထိ အောက်ကိုင်းမှာ အရွက် တစိချေကို အပင်အတွက် အစာချက်နိုင်အောင် ထားလိုက်ပါ။

အထက်ကိုင်းမှာ အရွက် ၅ ရွက် ၆ ရွက်လောက် ထွက်လာဗျာလ်ဆိုကေတော့ခါ အောက်ကိုင်းက အကိုင်းအတက်တိကို ချိုးပလိုက်ပါ။

အပင်ကြီးလာကေလည်း အောက်ကိုင်းက ထွက်လာသမျှ အကိုင်းတိကို ယပြတ် ဖြတ်ပီးလားဖို့ လိုပါဖို့။

အေနည်းကို ရခိုင်ပြည်မှာ ရှိနိန်ဗြီးသား အပင်တမျိုးမျိုးနန့် ရခိုင်ပြည်မှာ မယဉ်ပါးသိမ့်ရေ မျိုးတူ အပင်တမျိုးမျိုးကို စီးပွားရေးအတွက် တွက်ချက်ပနာ သုံးနိုင်ပါရေ။

၎ - ၅ ရက်သား ခရမ်းချိုင်သီးပင်တိကို ဆက်ကတ်စွာ တွိဖူးပါရေ။ အပင်ငယ်ချေ z ပုံစံ ဖြတ်စရာ မလိုပါ။ ၄၅ ဒီဂရီ စစောင်းလောက်ဆို ရပါရေ။

ကျန် နည်းလမ်း ၂ ခုကို ထပ် ရွီးပီးပါမေ။


ကျော်ဝင်းခိုင်